.png)
Scriptures
Scriptures
બાપાશ્રીની વાતોનો પરિચય
1. બાપાશ્રીની વાતો એટલે શું ?સ્વામિનારાયણ ભગવાનના સ્વરૂપની સર્વોપરી નિષ્ઠા અને અનાદિમુક્તની સ્થિતિ આ બે સનાતન સિદ્ધાંતોના રહસ્યજ્ઞાનને સમજાવવા તથા તેનું પ્રવર્તન કરવા માટે જ જેમનું શ્રીજીસંકલ્પથી પ્રાગટ્ય થયું હતું એવા જીવનપ્રાણ અબજીબાપાશ્રી. તેઓએ આ લોકમાં પ્રગટ થઈ જે કાંઈ શ્રીજીસંમત સનાતન સિદ્ધાંતો વચનામૃત ગ્રંથના જ બાધ-બાધાંતરોથી સમજાવ્યા, સંતો ને હરિભક્તોને વર્તનની અણીશુદ્ધતા રાખવા જે આગ્રહો જણાવ્યા તથા અનાદિમુક્તની સ્થિતિ પમાડી કેવળ મૂર્તિના સુખભોક્તા કરવા જે વાતોનો જ્ઞાનપ્રવાહ ચલાવ્યો તે વાતોને ગ્રંથસ્થ કરી, ‘અબજીબાપાશ્રીની વાતો’ બે ભાગમાં પ્રકાશિત કરવામાં આવી છે.
2. બાપાશ્રીની વાતો ક્યારે બની ?
સંવત ૧૯૬૨ વૈશાખ વદ ૧ પડવાને દિવસથી બાપાશ્રીની વાતોના લખાણનો પ્રારંભ થયો.
3. બાપાશ્રીની વાતોનો સંગ્રહ કોણે કર્યો ?
નીડર સિદ્ધાંતવાદી અનાદિમુક્ત સદ્દગુરુશ્રી ઈશ્વરચરણદાસજી સ્વામીશ્રીએ.
4. બાપાશ્રીની વાતોનો ઉદ્ભવ કેવી રીતે થયો ?
વિ.સ.૧૯૬૨માં કચ્છમાં રામપુર ખાતે મુક્તરાજ ધનબાએ ચૈત્ર વદ ૨થી વૈશાખ સુદ ૧ સુધી પારાયણ કરાવવાનું નક્કી કર્યું અને બાપાશ્રીને પ્રાર્થના કરી કે, “આ પારાયણમાં આપ પધારો અને સાથે સદ્ગુરુઓને પણ લાવો.” બાપાશ્રીએ સદ્ગુરુશ્રી પર પત્ર લખાવ્યો કે, “રામપુરમાં સાંખ્યયોગી ધનબાએ પારાયણ બેસાડવાનું નક્કી કર્યું છે, તો તમે સૌ સંતો મંડળે સહિત કચ્છમાં આવો.”
બાપાશ્રીનો પત્ર મળતાં સૌ સંતો રાજી થયા અને સદ્. વૃંદાવનદાસજી સ્વામી, સદ્. ઈશ્વરચરણદાસજી સ્વામી અને સદ્. ઘનશ્યામજીવનદાસજી સ્વામી આદિ સદ્ગુરુઓ અમદાવાદમાં ચૈત્ર સુદ ૯નો હરિનવમીનો સમૈયો કરી કચ્છમાં પધાર્યા. આ યજ્ઞમાં બાપાશ્રી તથા સદ્ગુરુઓએ સૌને દર્શન-સમાગમનું સુખ આપ્યું અને સૌને રાજી કર્યા. મુક્તરાજ ધનબા પણ બાપાશ્રી અને સદ્ગુરુશ્રીના પધારવાથી તો વળી ઘણાબધા સંતો-હરિભક્તોએ લાભ લીધો તેનાથી રાજી થયાં. યજ્ઞ-પારાયણની પૂર્ણાહુતિ બાદ સૌ સંતો-હરિભક્તોને લઈ બાપાશ્રી સદ્ગુરુઓ સહિત વૃષપુર પધાર્યા. પરંતુ રસ્તામાં સદ્ગુરુશ્રીના મનમાં એક જ વાત ઘોળાયા કરે કે, “વર્તમાનકાળે બાપાશ્રી મૂર્તિના સુખની નિત્ય નવી અનંત પ્રકારની વાતો કરી ખાંગા કરી રહ્યા છે ત્યારે અનંત જીવોના સમાસને અર્થે બાપાશ્રીની વાતોનો જો સંગ્રહ કરવામાં આવે તો બહુ સારું. પણ બાપાશ્રી જો આ વાતો લખાવવાની આજ્ઞા આપે તો જ લખાય, મરજી વગર લખાય કેમ ?” વિચારમાં ને વિચારમાં વૃષપુર પહોંચ્યા. ઠાકોરજીનાં દર્શન કરી કથાવાર્તા, નિયમચેષ્ટા પતાવી સૌ હરિભક્તો ઘેર ગયા અને સૌ સંતોએ આસન કર્યાં, ત્યારે રાત્રિના બાર થયા. વૈશાખી પૂનમનો પૂર્ણ ચંદ્ર આકાશમાં સોળે કળાએ ખીલ્યો હતો અને બાપાશ્રી પણ પ્રસન્નવદને પોતાના આસને બિરાજ્યા હતા. રામપુરથી વળતાં પોતાના મનમાં ઉદ્ભવેલા વિચારો બાપાશ્રીની આગળ એકાંતમાં રજૂ કરવાની તક જોઈ, કઈ રીતે રજૂ કરવા તે પોતે વિચારી રહ્યા હતા, ત્યાં તો અંતર્યામીપણે બાપાશ્રી બોલ્યા, “સ્વામી ! દર વર્ષે તમે અહીં આવો છો અને જોગ-સમાગમ કરી રાજી થાવ છો. વાતો સાંભળો છો... ભારે ભારે પ્રશ્ન-ઉત્તર થાય છે અને નર્યો દિવ્યભાવ વર્તાય છે. સદ્. નિર્ગુણદાસજી સ્વામી અંતર્ધાન થયા ત્યારથી તમે વખતોવખત આવો છો પણ આ વાતોની યાદી થતી નથી. જો આ વાતોની યાદી થાય તો આગળ જતાં અનંત જીવોને સમાસ થાય.” સદ્ગુરુશ્રીના આનંદનો પાર ન રહ્યો. પોતાના મનની વાત બાપાશ્રીએ કરી અને સદ્ગુરુશ્રી તો રાજી રાજી થઈ ગયા. આનંદમગ્ન બનેલા સદ્ગુરુશ્રી બોલ્યા, “બાપા ! મને તો ઘણુંય થાય છે કે લખું, પણ આપની આજ્ઞા વગર કેમ લખાય ? આપની આજ્ઞા કઈ રીતે લેવી એ જ વિચાર આવતો હતો.” ત્યારે બાપાશ્રીએ કહ્યું, “સ્વામી ! હવેથી લખતા રહેજો, નકરો પરભાવ ચાલ્યો આવે છે. આગળ જતાં એ વાતો ઘણાને સમાસ કરશે..” અને આ રીતે બાપાશ્રીના મુખારવિંદમાંથી નીકળતી શ્રીહરિના મહિમાની જ્ઞાનગંગાને ઝીલવાનું અલૌકિક કાર્ય શરૂ થયું વિ.સં. ૧૯૬૨ના વૈશાખ વદ ૧થી. સદ્ગુરુશ્રીએ કાગળ અને કલમ મગાવ્યાં અને બાપાશ્રીની વાતોનો સંગ્રહ કરવાનું શરૂ થયું.
5. બાપાશ્રીની વાતો કેટલી છે ? પરચા કેટલા છે ?
બાપાશ્રીની વાતો : ભાગ : ૧ – ૨૫૧ વાતો
બાપાશ્રીની વાતો : ભાગ : ૨ – ૧૫૭ વાતો
